Xeberhub.com xəbər verir ki, Ukrayna hərbçiləri iyulun 19-na keçən gecə Rusiyanın bir sıra bölgələrinə pilotsuz uçuş aparatları (PUA) ilə hücum edib.
Rusiyanın Stavropol vilayətinin qubernatoru Vladimir Vladimirovun açıqlamasına görə, PUA hücumu nəticəsində sənaye obyektlərində yanğınlar baş verib. O bildirib ki, yanğın zamanı partlayıcı və tezalışan materialların detonasiya etməsi səbəbindən partlayış səsləri eşidilib.
Qubernatorun sözlərinə görə, hazırda əhalinin həyatı və sağlamlığı üçün təhlükə yoxdur. Stavropol yaxınlığındakı Vyazniki yaşayış məntəqəsində təhlükəsizlik məqsədilə bəzi sakinlər yaxınlıqdakı evlərdən təhlükəsiz əraziyə köçürülüb. Yanğının söndürülməsi istiqamətində işlər davam etdirilir.
Açıq mənbələr üzrə araşdırma aparan OSINT analitiklərinin məlumatına əsasən, Stavropol və ətraf ərazilərdə üç neft bazasında yanğın baş verə bilər. Onların arasında "Rosneft" şirkətinə məxsus Vyazniki neft bazası və "Lukoyl" şirkətinin Stavropol neft bazasının olduğu bildirilir.
Bundan başqa, Novorossiysk yaxınlığında yerləşən Xəzər Boru Kəməri Konsorsiumunun (KPK) dəniz terminalı da PUA hücumuna məruz qalıb. Konsorsiumun məlumatına görə, hadisə nəticəsində iki tanker zərər görüb. Liberiya bayrağı altında üzən "ASIA" tankerində yanğın qeydə alınıb. Hadisə zamanı ekipaj üzvləri və terminal əməkdaşları arasında ölən və yaralanan olmayıb, neft sızması baş verməyib.
Kursk vilayətində isə PUA-ların yaşayış binalarına zərbə endirdiyi bildirilib. Vilayət rəhbəri Aleksandr Xinşteynin sözlərinə görə, bir neçə çoxmərtəbəli binanın mənzilləri və fasadları zədələnib, evlərdən birində yanğın baş verib. Sakinlər təxliyə olunub, bir nəfərin xəsarət aldığı qeyd edilir.
Həmçinin, Lvov şəhərində avtobus, ərzaq mağazası və dayanacağa zərbələr endirildiyi bildirilib. Hadisə nəticəsində avtobus sürücüsü və mağazanın yaxınlığında olan şəxs xəsarət alıb.
Rusiya Müdafiə Nazirliyi isə iyulun 19-na keçən gecə hava hücumundan müdafiə sistemləri tərəfindən 140 Ukrayna PUA-sının məhv edildiyini açıqlayıb.
