Xeberhub.com xəbər verir ki, "Sabah" klubunun yeni transferi Eyden Makkarti Azərbaycan təmsilçisinə keçidini karyerasının ən önəmli mərhələsi kimi dəyərləndirib.
Cənubi Afrikadan olan 22 yaşlı mərkəz müdafiəçisi vətən mətbuatına açıqlamasında bildirib ki, "Sabah"a transfer onun üçün böyük fürsətdir və bu imkandan maksimum yararlanmağa çalışacaq.
"Sabah" klubuna transferim indiyə qədərki karyeramın ən möhtəşəm sınağıdır. Gələcək hədəflərimə doğru irəliləmək üçün mənə verilən bu unikal şansdan ən yüksək səviyyədə istifadə etməyə qərarlıyam", – deyə futbolçu vurğulayıb.
Yay transfer dövründə Cənubi Afrika Respublikasının "Kayzer Çifs" klubundan "Sabah"a keçən müdafiəçi inkişafında atası Fabian Makkartinin və psixoloji hazırlıq üzrə mütəxəssis Henninqin xüsusi rol oynadığını bildirib.
Makkarti qeyd edib ki, atası ona futbolçu kimi formalaşmaqda böyük dəstək verib, Henninq isə meydanda soyuqqanlı qalmağı və çətin vəziyyətlərdə düzgün qərarlar qəbul etməyi öyrədib.
Futbolçu həyat prinsipini də bölüşərək bildirib ki, yalnız nəzarət edə bildiyi məqamlara fokuslanır, seçdiyi yola inanır və uğursuzluqları gələcək uğurlar üçün təcrübə hesab edir.
