XeberHub.com xəbər verir ki, "The Washington Post" nəşrinin Pentaqondakı mənbələrə istinadən yaydığı məlumata görə, ABŞ Müdafiə Nazirliyi İranla bağlı davam edən hərbi gərginlik fonunda büdcə vəsaitlərini gözləniləndən daha sürətlə xərcləyir. Bu səbəbdən bəzi vacib müdafiə proqramlarının maliyyələşdirilməsində yaxın həftələrdə çətinlik yarana biləcəyi bildirilir.
Məlumata əsasən, döyüş hazırlığının yüksək səviyyədə saxlanılması üçün Pentaqon müəyyən sahələrdə qənaət tədbirlərinə əl atıb. Xüsusilə hərbi təlimlərə ayrılan vəsaitlərin bir hissəsinin azaldıldığı qeyd olunur ki, bu da əsas prioritetlərin maliyyələşdirilməsinə imkan yaratmalıdır.
Nəşrin yazdığına görə, ABŞ Hərbi Dəniz Qüvvələri və Hərbi Hava Qüvvələri üçün 2026-cı maliyyə ili çərçivəsində ayrılmış bəzi büdcə vəsaitləri artıq iyulun sonuna qədər tam istifadə oluna bilər. Bunun qarşısını almaq məqsədilə Pentaqon silah tədarükü və təlim proqramları üçün nəzərdə tutulmuş 4,3 milyard dolların daha təcili ehtiyaclara yönəldilməsi üçün Konqresə müraciət edib. Hazırda həmin müraciətə baxılması gözlənilir.
Eyni zamanda bildirilir ki, Ağ Ev daha əvvəl hərbi əməliyyatların maliyyələşdirilməsi məqsədilə ABŞ Konqresindən 67 milyard dollar həcmində əlavə vəsait ayrılmasını istəyib. Lakin Nümayəndələr Palatasının iyulun 23-dən etibarən tətilə çıxması planlaşdırıldığından, bu məsələ ilə bağlı qərarın qəbulunun bir neçə həftə gecikə biləcəyi istisna edilmir.
