“Qızıl qübbə”nin ilk sınaqları başa çatıb
ABŞ-nin yeni “Qızıl qübbə” raketdən müdafiə sisteminin hazırlanmasında iştirak edən bir neçə podratçı şirkət layihə üzrə ilk əsas sınaqları tamamlayıb.
Xeberhub.com xəbər verir ki, ABŞ Kosmik Qüvvələrinin generalı Maykl Getleynin sözlərinə görə, “SpaceX” və “Northrop Grumman” da daxil olmaqla bir sıra şirkətlər sistem çərçivəsində ilkin testləri uğurla həyata keçiriblər. Məlumat “Bloomberg” agentliyinə istinadən yayılıb.
Sınaqlar zamanı sensorlardan əldə edilən məlumatların ələkeçiriciyə ötürülməsi, eləcə də sistem üçün nəzərdə tutulan güc qurğularının imkanları yoxlanılıb.
İlkin test mərhələsinin başa çatmasından sonra şirkətlərin növbəti sınaqlara keçməsi planlaşdırılır. Növbəti mərhələdə hazırlanmış texnologiyaların kosmos şəraitində fəaliyyət imkanlarının nümayiş etdirilməsi nəzərdə tutulur.
“Qızıl qübbə” ABŞ ərazisini uzaqmənzilli və hipersəs raketləri də daxil olmaqla müxtəlif raket təhdidlərindən qorumaq məqsədi daşıyan genişmiqyaslı raketdən müdafiə layihəsidir. Sistem üçün kosmos əsaslı sensor və digər müdafiə imkanlarının yaradılması nəzərdə tutulur.
