Günəşdə M sinifli partlayışlar baş verə bilər
Avqustun 12-13-də Günəşdə partlayış aktivliyinin əsasən aşağı səviyyədə qalacağı, lakin M sinfinə aid güclü partlayışların baş verməsinin mümkün olduğu proqnozlaşdırılır.
Xeberhub.com xəbər verir ki, mütəxəssislərin məlumatına görə, qeyd olunan tarixlərdə Günəşdə ümumi aktivlik aşağı olacaq. Bununla belə, M sinfinə daxil olan partlayışların qeydə alınması ehtimalı istisna edilmir.
Günəşdə baş verən partlayışlar rentgen şüalanmasının gücünə əsasən A, B, C, M və X olmaqla beş sinfə ayrılır. A sinfi ən zəif partlayışları, X sinfi isə ən güclü partlayışları ifadə edir.
Təsnifata əsasən, ən aşağı səviyyə olan A0.0 sinfi Yer orbitində hər kvadratmetr üçün 10 nanovat şüalanma gücünə uyğun gəlir. Siniflər üzrə hər növbəti mərhələyə keçdikdə şüalanmanın gücü 10 dəfə artır.
Mütəxəssislər bildirirlər ki, Günəş partlayışları bir sıra hallarda Günəş plazmasının kosmosa atılması ilə müşayiət olunur. Plazma buludlarının Yerə çatması isə geomaqnit sahəsində dəyişikliklərə və maqnit qasırğalarının yaranmasına səbəb ola bilər.
Bu səbəbdən qarşıdakı günlərdə Günəşdə baş verəcək aktivliyin kosmik hava şəraitinə təsiri də müşahidə ediləcək.
