"Zirə"nin baş məşqçisi Rəşad Sadıqov "Payde" ilə oyundan sonra komandasının çoxlu qol imkanlarından yararlana bilmədiyini bildirib.
Xeberhub.com xəbər verir ki, AZƏRTAC-ın yaydığı məlumata görə, Rəşad Sadıqov UEFA Konfrans Liqasının II təsnifat mərhələsində "Payde" ilə keçirilən cavab oyunundan (1:1) sonra təşkil olunan mətbuat konfransında matçı dəyərləndirib.
Baş məşqçi bildirib ki, qarşılaşma haqqında çox danışmağa ehtiyac yoxdur və oyunun gedişi hər şeyi göstərib.
Onun sözlərinə görə, "Zirə" matç ərzində çoxsaylı qol epizodları yaradıb və bu imkanlar üç-dörd oyuna bəs edəcək qədər olub. Lakin komanda bu fürsətlərdən yararlana bilməyib.
Rəşad Sadıqov əlavə edib ki, hər iki oyunun ümumi mənzərəsinə baxdıqda mərhələni keçməyə daha yaxın tərəfin "Zirə" olduğunu düşünür. O, sonda rəqib komandanı növbəti mərhələyə yüksəlməsi münasibətilə təbrik edib.
Qeyd edək ki, "Payde" iki oyunun yekununda 2:1 hesablı üstünlüklə "Zirə"ni mübarizədən kənarlaşdıraraq UEFA Konfrans Liqasının növbəti təsnifat mərhələsinə vəsiqə qazanıb.
