Xeberhub.com xəbər verir ki, Metbuat.az-ın yaydığı məlumata əsasən, Avrasiya İqtisadi İttifaqı (Aİİ) ilə Birləşmiş Ərəb Əmirlikləri (BƏƏ) arasında imzalanmış azad ticarət sazişi 2026-cı il oktyabrın 6-dan etibarən qüvvəyə minəcək.
Bu barədə Avrasiya İqtisadi Komissiyasının ticarət naziri Andrey Slepnev Qırğızıstanın Çolpon-Ata şəhərində keçirilən Avrasiya Hökumətlərarası Şurasının iclası zamanı jurnalistlərə açıqlamasında məlumat verib.
Nazir bildirib ki, tərəflər arasında nota mübadiləsi artıq başa çatıb və bununla da sazişin ratifikasiyası, eləcə də qüvvəyə minməsi üçün tələb olunan bütün daxili prosedurlar tamamlanıb.
Andrey Slepnevin sözlərinə görə, əldə olunan razılaşmaya əsasən, Aİİ ilə BƏƏ arasında azad ticarət sazişi 6 oktyabr 2026-cı il tarixindən rəsmi şəkildə tətbiq ediləcək.
Qeyd edək ki, Avrasiya İqtisadi İttifaqına Rusiya, Belarus, Qazaxıstan, Qırğızıstan və Ermənistan üzvdür. Sazişin qüvvəyə minməsi tərəflər arasında ticarət dövriyyəsinin artmasına və iqtisadi əməkdaşlığın daha da genişlənməsinə şərait yaradacaq.
