Xeberhub.com xəbər verir ki, siyasi şərhçi Züriyə Qarayeva Rusiyanın Finlandiya və Norveç sərhədləri yaxınlığında hərbi infrastrukturunu genişləndirməsini regionda dəyişən təhlükəsizlik mühitinə verilən strateji cavab kimi dəyərləndirib.
Ekspert bildirib ki, Finlandiyanın NATO-ya üzv olmasından sonra Alyansla Rusiya arasında quru sərhədinin xeyli uzanması Moskvanın şimal istiqamətində hərbi fəaliyyətini gücləndirməsinə təsir edən əsas amillərdən biridir. Onun sözlərinə görə, Norveç istiqaməti də Arktika bölgəsi, Şimal Donanması və Kola yarımadasında yerləşən strateji hərbi obyektlər səbəbindən Rusiya üçün xüsusi əhəmiyyət daşıyır.
Züriyə Qarayevanın fikrincə, sərhədyanı hərbi bazaların genişləndirilməsi yaxın perspektivdə hücum hazırlığı deyil, daha çox uzunmüddətli hərbi planlaşdırma, çəkindirmə siyasəti və Qərbə ünvanlanan siyasi mesaj kimi qiymətləndirilməlidir. O qeyd edib ki, mövcud məlumatlar Rusiyanın Finlandiya sərhədi yaxınlığındakı hərbi obyektlərin imkanlarını artırmağı və Ukraynada döyüş təcrübəsi əldə etmiş bölmələri gələcəkdə həmin ərazilərə yerləşdirməyi planlaşdırdığını göstərir.
Siyasi şərhçi hesab edir ki, bu addımın Ukrayna cəbhəsində Rusiyaya həlledici üstünlük qazandıracağı ehtimalı yüksək deyil. Onun sözlərinə görə, Moskva eyni vaxtda həm Ukrayna istiqamətində hərbi əməliyyatları davam etdirmək, həm də NATO sərhədlərində əlavə qüvvələr saxlamaq məcburiyyətində qalarsa, maliyyə, texnika və canlı qüvvə resurslarını daha geniş əraziyə bölməli olacaq.
Ekspert əlavə edib ki, Kreml şimal istiqamətində hərbi fəallığı artırmaqla NATO ölkələrini əlavə müdafiə xərclərinə və yeni qüvvələr yerləşdirməyə sövq etməyə çalışa bilər. Bu isə Ukraynaya ayrılan resursların müəyyən hissəsinin Avropanın öz təhlükəsizliyinə yönəldilməsi məqsədi daşıya bilər.
Züriyə Qarayeva vurğulayıb ki, belə siyasət gözlənilən nəticəni verməyə də bilər. Onun fikrincə, əgər bu addımlar NATO üzvlərinin müdafiə xərclərinin və regional hərbi əməkdaşlığının daha da genişlənməsinə səbəb olarsa, Moskva əks nəticə ilə üzləşə bilər. Ekspert hesab edir ki, Rusiyanın şimal sərhədlərində hərbi infrastrukturunu genişləndirməsi Ukraynada sülh perspektivindən çox, Avropanın gələcək təhlükəsizlik mühitinə uzunmüddətli qarşıdurma kontekstində hazırlaşdığını göstərir.
