Naxçıvanda 420 kilometr avtomobil yolu əsaslı təmir olunacaq – SİYAHI
Prezident İlham Əliyevin Naxçıvan Muxtar Respublikasının sosial-iqtisadi inkişafının sürətləndirilməsinə dair əlavə tədbirlər haqqında Sərəncamı ilə muxtar respublikada bir sıra avtomobil yollarının əsaslı təmiri nəzərdə tutulub.
Xeberhub.com xəbər verir ki, Oxu.Az-ın President.az-a istinadən məlumatına görə, yolların təmiri üçün Naxçıvan Muxtar Respublikasının Nazirlər Kabinetinə 70 milyon manat ayrılıb.
Ümumi uzunluğu 420 kilometr olan yollar 156,3 min nəfərin yaşadığı 26 yaşayış məntəqəsini birləşdirir.
Sərəncama əsasən, Naxçıvanda əsaslı təmir olunacaq avtomobil yollarının siyahısı belədir:
- Ordubad rayonunda Biləv–Bist–Ələhi–Xurs–Nürgüt–Tivi–Nəsirvaz avtomobil yolu – 40 kilometr. Yol 3 413 nəfərin yaşadığı 7 yaşayış məntəqəsini əhatə edir.
- Culfa rayonunda Kırna–Dizə–Gal–Şurud avtomobil yolu – 30 kilometr. Bu istiqamət üzrə 1 785 nəfərin yaşadığı 4 yaşayış məntəqəsi əhatə olunur.
- Naxçıvan şəhərində avtomobil yolları – ümumilikdə 50 kilometr. Təmir işləri Azərbaycan, Zərifə Əliyeva, 20 Yanvar və 6-cı küçələr, Xətai küçəsi, 12, 48, 49, 52, 54, 56, 57, 59 və 60-cı məhəllələr, həmçinin Əliabad qəsəbəsi və Qaraxanbəyli kəndindəki yolları əhatə edəcək.
- Ordubad şəhərində avtomobil yolları – 60 kilometr.
- Babək şəhərində avtomobil yolları – 33 kilometr.
- Şahbuz şəhərində avtomobil yolları – 31 kilometr.
- Culfa şəhərində avtomobil yolları – 24 kilometr.
- Babək rayonunun Qahab, Naxışnərgiz, Şəkərabad, Çeşməbasar və Güznüt kəndlərində avtomobil yolları – 59 kilometr.
- Culfa rayonunun Əbrəqunus və Bənəniyar kəndlərində avtomobil yolları – 41 kilometr.
- Ordubad rayonunun Dəstə kəndində avtomobil yolları – 33 kilometr.
- Şərur rayonunun Qarxun kəndində avtomobil yolları – 13 kilometr.
- Şahbuz rayonunun Nursu kəndində avtomobil yolları – 6 kilometr.
Beləliklə, sərəncam çərçivəsində Naxçıvan Muxtar Respublikasında ümumi uzunluğu 420 kilometr olan avtomobil yollarının əsaslı təmiri həyata keçiriləcək.
Naxçıvanın inkişafına 258 milyon manat ayrılır
Qeyd edək ki, Prezident İlham Əliyevin sərəncamı ilə Naxçıvan Muxtar Respublikasının sosial-iqtisadi inkişafının sürətləndirilməsi üçün ümumilikdə 258 milyon manat vəsait ayrılması nəzərdə tutulub.
Bu vəsaitin 70 milyon manatı avtomobil yollarının əsaslı təmirinə yönəldiləcək.
Sərəncam çərçivəsində həmçinin Tivi Su Elektrik Stansiyasının tikintisinin davam etdirilməsi, Naxçıvan Dövlət Universitetində 1000 yerlik yataqxananın inşası, yeni məktəbəqədər təhsil müəssisələrinin tikintisi, yaşayış binalarının təmiri, şəhərlərarası ictimai nəqliyyat parkının yenilənməsi və istilik qazanxanalarının əsaslı təmiri nəzərdə tutulur.
