Tramp: İsrailin Livan və Suriyadan geri çəkilməsi bölgədə gərginliyi azalda bilər
ABŞ Prezidenti Donald Tramp İsrailin Livanın cənubu və Suriyanın cənubunun bəzi hissələrindən geri çəkilməsinin Yaxın Şərqdə vəziyyətin sabitləşməsinə müsbət təsir göstərə biləcəyini bildirib.
Tramp bu fikirləri Fox News telekanalına müsahibəsində səsləndirib. Onun sözlərinə görə, belə bir addım bölgədə gərginliyin azalmasına kömək edə və diqqətin daha vacib məsələlərə yönəldilməsinə imkan verə bilər.
"Düşünürəm ki, Livanın cənubundan və Suriyanın cənubunun bəzi hissələrindən çıxmaq yaxşı olardı. O zaman vəziyyətin bir qədər sakitləşdiyini görə bilərsiniz. Çünki enerjimizi daha böyük məsələyə – İrana yönəltməliyik", – deyə ABŞ Prezidenti bildirib.
Donald Tramp müsahibəsində Suriyanın keçid dövrü prezidenti Əhməd əl-Şaraanın "Hizbullah"a qarşı əməliyyat keçirmək niyyətində olduğunu da qeyd edib.
"Əhməd əl-Şaraa “Hizbullah”a qarşı əməliyyat keçirmək istəyərdi və bunu fərqli üsulla edərdi. O, binaları dağıtmazdı. Mən binaların dağıdılmasını görməyə nifrət edirəm. Düşünürəm ki, o, bunu daha dəqiq həyata keçirərdi", – Tramp vurğulayıb.
"Fox News"un aparıcısının Suriyanın bunun üçün ABŞ-dən "yaşıl işıq" almalı olub-olmaması ilə bağlı sualını cavablandıran Tramp "Bu barədə düşünürəm", – deyə bildirib.
