Naxçıvan şəhərində yerləşən 110/35/10 kV-luq "Xalçaçılıq" yarımstansiyasında aparılan yenidənqurma işləri ilə əlaqədar iyulun 19-da bəzi ərazilərdə elektrik enerjisinin verilişi müvəqqəti dayandırılacaq.
Xeberhub.com xəbər verir ki, bu barədə "Azərişıq" ASC-nin Naxçıvan Regional Enerji Təchizatı və Satışı İdarəsi məlumat yayıb.
Məlumata əsasən, 19 iyul tarixində saat 02:00-dan 05:00-dək Naxçıvan şəhərinin İstiqlal küçəsində yerləşən 111, 113, 115, 117 və 129 nömrəli binalarda, eləcə də Şadlinski, Bəktaşi, Nizami, İlqar Ələkbərov, Səməd Vurğun, Xətai və Vüqar Abbasov küçələrində elektrik enerjisinin verilişində fasilə olacaq.
Bundan başqa, 54, 56, 59, 60 və 61-ci məhəllələr, Əcəmi məhəlləsi, Əliabad qəsəbəsi, həmçinin Babək rayonunun bəzi yaşayış məntəqələri və Şahbuz rayonu da planlaşdırılan enerji kəsintisinin tətbiq ediləcəyi ərazilər sırasındadır.
Qurum bildirib ki, elektrik şəbəkəsinin etibarlılığını və dayanıqlığını artırmaq məqsədilə yarımstansiyalarda, transformator məntəqələrində və elektrik xətlərində təmir-bərpa və yenidənqurma işləri mərhələli şəkildə həyata keçirilir.
Rəsmi açıqlamaya görə, işlər yekunlaşdıqdan sonra qeyd olunan ərazilərdə abonentlərin daha keyfiyyətli, fasiləsiz və etibarlı elektrik enerjisi ilə təmin olunması nəzərdə tutulur.
