Xeberhub.com xəbər verir ki, Rusiya Dövlət Duması məhkumluğu qüvvədə olan miqrantların ölkədə hüquqi status əldə etməsini məhdudlaşdıran yeni qanun layihəsinə baxacaq.
Dövlət Dumasının sədri Vyaçeslav Volodin bildirib ki, yaxın günlərdə müzakirəyə çıxarılacaq sənəd məhkumluğu ödənilməmiş və ya götürülməmiş şəxslərin Rusiya vətəndaşlığı almasını, eləcə də ölkədə yaşamaq hüququ qazanmasını istisna etməyi nəzərdə tutur.
Məlumata görə, bu məhdudiyyət Rusiya daxilində və ya xarici ölkələrdə törədilmiş cinayətlərə görə yaranmış məhkumluqlara da şamil ediləcək.
Volodin qeyd edib ki, belə hallar müəyyənləşdirildiyi təqdirdə, həmin şəxslərə daha əvvəl verilmiş yaşayış icazələri və ya müvəqqəti yaşayış icazələri də ləğv edilə bilər.
Bildirilib ki, yeni qaydalar Rusiyada qaçqın statusu alan, siyasi və ya müvəqqəti sığınacaq verilmiş xarici vətəndaşlara aid olmayacaq.
Dövlət Dumasının sədri əlavə edib ki, 2024-cü ildən etibarən Rusiyada miqrasiya sahəsi ilə bağlı 30 federal qanun qəbul olunub.
