Rusiyanın Ryazan şəhərində səhər saatlarında baş verdiyi bildirilən kütləvi pilotsuz uçuş aparatı (PUA) hücumu nəticəsində bir neçə sənaye obyektində yanğın qeydə alınıb. Hadisə zamanı altı nəfərin xəsarət aldığı açıqlanıb.
XeberHub.com xəbər verir ki, əsas mənbə Rusiya Telegram kanallarında yayılan məlumatlar və Ryazan vilayətinin qubernatoru Pavel Malkovun açıqlamasıdır.
Məlumata görə, Ryazanda hava həyəcanı siqnalı saat 04:30 radələrində işə düşüb. Bundan sonra şəhər səmasında PUA-ların müşahidə edildiyi bildirilib.
Sosial şəbəkələrdə saat 05:20-dən etibarən partlayış səsləri, havada uçan dronlar və şəhər üzərində yüksələn tüstünü əks etdirən görüntülər yayılmağa başlayıb.
İlkin məlumatlara əsasən, zərbə nəticəsində "Wildberries" şirkətinin çeşidləmə kompleksi və Ryazan neft emalı zavodunda yanğın baş verdiyi iddia olunur. Həmçinin "Ryazanski" Sənaye Parkının ərazisində yerləşən anbarda da yanğın qeydə alındığı bildirilib.
Sənaye parkındakı obyektə girişin səhər saatlarında məhdudlaşdırıldığı açıqlanıb.
Ryazan vilayətinin qubernatoru Pavel Malkov hadisəni təsdiqləyərək bildirib ki, sənaye zonalarında yanğınlar PUA qalıqlarının düşməsi nəticəsində baş verib.
"Hadisə nəticəsində altı nəfər xəsarət alıb", - deyə qubernator bildirib.
Hadisə ilə bağlı araşdırmalar və nəticələrin qiymətləndirilməsi davam etdirilir.
