Ali məktəblərdə ixtisas seçiminin başlanma vaxtı açıqlanıb
Ali təhsil müəssisələrinə qəbul üçün ixtisas seçimi prosesinin avqust ayının 10-dan sonra başlayacağı gözlənilir.
Xeberhub.com xəbər verir ki, bu barədə Dövlət İmtahan Mərkəzinin (DİM) aparat rəhbəri Vəfadar Misirov jurnalistlərə açıqlamasında məlumat verib. Məlumatın ilkin mənbəyi **"Report"**dur.
DİM rəsmisinin sözlərinə görə, qarşıdakı günlərdə imtahan nəticələri ilə bağlı apellyasiya müraciətlərinin qəbulu həyata keçiriləcək. Daha sonra daxil olan müraciətlər araşdırılacaq və paralel olaraq qabiliyyət imtahanları davam etdiriləcək.
Vəfadar Misirov bildirib ki, əksər qabiliyyət imtahanlarının yaxın günlərdə yekunlaşması nəzərdə tutulur. İdman istiqaməti üzrə keçirilən qabiliyyət imtahanları isə avqustun 7-dək davam edəcək.
Bundan sonra ali məktəblərə qəbul prosesinin əsas mərhələlərindən biri olan ixtisas seçiminə start veriləcək.
DİM rəsmisi qeyd edib ki, abituriyentlərin düzgün seçim etməsi üçün əvvəlcə müsabiqə vəziyyəti barədə ətraflı məlumat əldə etmələri vacibdir. Bunun üçün bal intervallarında neçə nəfərin olduğu, plan yerlərinin sayı və rəqabət səviyyəsi açıqlanacaq.
Bildirilib ki, sözügedən məlumatlar avqustun əvvəlində dərc olunacaq "Abituriyent" jurnalının 4-cü nömrəsində, həmçinin apellyasiya və qabiliyyət imtahanlarının nəticələri tam yekunlaşdıqdan sonra təqdim ediləcək materiallarda yer alacaq.
Həmin məlumatlar əsasında abituriyentlər topladıqları bala uyğun ixtisasları daha düzgün müəyyənləşdirə və seçimlərini daha məqsədyönlü şəkildə həyata keçirə biləcəklər.
