Xeberhub.com xəbər verir ki, blitz.bg-nin yaydığı məlumata əsasən, Bolqarıstanın "ÇSKA Sofiya" klubunun müdafiəçisi Teodor İvanov UEFA Avropa Liqasının II təsnifat mərhələsində "Qarabağ"a qarşı keçirilən ilk oyundan sonra fikirlərini bölüşüb.
Futbolçu komandasının çıxışını müsbət qiymətləndirərək, ağır hava şəraitinə baxmayaraq meydanda xarakter göstərdiklərini bildirib. O, "Qarabağ"ın güclü rəqib olduğunu vurğulayıb və şəxsi performansından razı qalsa da, daha yaxşı oynaya biləcəyini qeyd edib.
İvanov cavab qarşılaşmasını həlledici oyun kimi dəyərləndirib. Onun sözlərinə görə, növbəti mərhələyə yüksəlmək uğrunda mübarizədə yalnız qalib gələn komanda yoluna davam edəcək.
Müdafiəçi "Qarabağ"ın hücum xəttinin fərqli oyun üslubuna malik olduğunu deyərək, klassik mərkəz hücumçusunun olmadığını, bütün hücumçuların sürətli və çevik hərəkət etdiyini bildirib. O, xüsusilə sonradan meydana daxil olan yamaykalı futbolçu Renaldo Sefasın çıxışını yüksək qiymətləndirərək onu çox keyfiyyətli oyunçu adlandırıb.
Qeyd edək ki, Bakıda keçirilən ilk görüş qolsuz heç-heçə ilə yekunlaşıb. Komandalar arasında cavab oyunu iyulun 30-da Bolqarıstanda keçiriləcək.
