Xeberhub.com xəbər verir ki, Oxu.Az-ın yaydığı məlumata əsasən, Rusiyanın Leninqrad vilayətində pilotsuz uçuş aparatının (PUA) hücumu nəticəsində "Wildberries" şirkətinin anbarında yanğın baş verib.
Leninqrad vilayətinin qubernatoru Aleksandr Drozdenkonun sözlərinə görə, Vsevolojsk rayonunun Novosaratovka kəndində yerləşən anbara düşən PUA nəticəsində üç nəfər xəsarət alıb. Yaralıların vəziyyətinin orta ağır olduğu və xəstəxanada müalicə aldıqları bildirilib.
Qubernator əlavə edib ki, Kirovsk rayonunun Sinyavino qəsəbəsində yerləşən "Severnaya" quşçuluq fabrikinin anbarlarından birinə də PUA düşüb. Hadisə nəticəsində tikilidə dağıntılar olsa da, xəsarət alan olmayıb.
Bundan əvvəl Sankt-Peterburq qubernatoru Aleksandr Beqlov şəhərin mülki infrastrukturuna dron hücumu edildiyini açıqlamışdı. Bildirilmişdi ki, hücum Moskva şosesi istiqamətində yerləşən obyektlərə təsir göstərib.
Rəsmi məlumata görə, gecə ərzində Leninqrad vilayətinin hava məkanında ümumilikdə 59 pilotsuz uçuş aparatı zərərsizləşdirilib. Təhlükə ilə əlaqədar bölgədə xəbərdarlıq elan olunub, həmçinin Pulkovo hava limanında uçuşların qəbulu və yola salınmasına müvəqqəti məhdudiyyətlər tətbiq edilib.
