ABŞ-nin Azərbaycandakı səfirliyi "Sülh naminə güləş" təşkilatı ilə Azərbaycan Güləş Federasiyası arasında imzalanan Anlaşma Memorandumunu iki ölkə arasında əməkdaşlığın inkişafı baxımından mühüm addım kimi qiymətləndirib.
XeberHub.com xəbər verir ki, Oxu.Az-ın məlumatına görə, bu barədə ABŞ-nin Azərbaycandakı səfirliyinin ictimai diplomatiya üzrə müşaviri Mark Hakef açıqlama verib.
O bildirib ki, ABŞ səfirliyi sözügedən əməkdaşlığı yüksək qiymətləndirir və bu təşəbbüsə görə Azərbaycan Güləş Federasiyasına təşəkkürünü ifadə edir.
Mark Hakef vurğulayıb ki, Azərbaycan bu günədək çoxsaylı beynəlxalq idman yarışlarına uğurla ev sahibliyi edib. Onun sözlərinə görə, ABŞ-dən Azərbaycana gələn idmançılar yalnız yarışlarda iştirak etməklə kifayətlənmir, eyni zamanda ölkənin tarixi, mədəniyyəti və milli dəyərləri ilə yaxından tanış olmaq imkanı qazanırlar.
Diplomat qeyd edib ki, bu cür proqramlar xalqlar arasında qarşılıqlı etimadın və anlaşmanın möhkəmlənməsinə xidmət edir. O əlavə edib ki, "Sülh naminə güləş" təşkilatı ilə Azərbaycan Güləş Federasiyası arasında imzalanan Anlaşma Memorandumu da Azərbaycan–ABŞ münasibətlərinin daha da inkişafına mühüm töhfə verəcək.
