Xeberhub.com xəbər verir ki, AZƏRTAC-ın yaydığı məlumata görə, Azərbaycan ilə Qırğızıstan arasında münasibətlər son illərdə sürətlə inkişaf edərək strateji tərəfdaşlıqdan müttəfiqlik səviyyəsinə yüksəlmək üzrədir. İki ölkə arasında siyasi dialoq, iqtisadi əməkdaşlıq, nəqliyyat-logistika layihələri və humanitar əlaqələr davamlı şəkildə genişlənir.
Məlumata görə, Azərbaycan və Qırğızıstan arasında diplomatik münasibətlər 1993-cü il yanvarın 19-da qurulub. Son illərdə Prezident İlham Əliyev və Qırğızıstan Prezidenti Sadır Japarov arasında formalaşan yüksək səviyyəli siyasi dialoq əlaqələrin inkişafına mühüm təkan verib. Son beş il ərzində iki ölkə arasında 13 yüksəksəviyyəli qarşılıqlı səfər həyata keçirilib.
İndiyədək Bakı və Bişkek arasında 105 ikitərəfli sənəd imzalanıb. Hazırda münasibətlərin yeni mərhələyə keçidi çərçivəsində "Müttəfiqlik münasibətləri haqqında Müqavilə"nin imzalanması gözlənilir.
İqtisadi əməkdaşlıq da genişlənməkdədir. 2025-ci ildə iki ölkə arasında ticarət dövriyyəsi 77,17 milyon dollara çatıb. Azərbaycanda 100-ə yaxın Qırğızıstan şirkəti fəaliyyət göstərir. Azərbaycan-Qırğız İnkişaf Fondu vasitəsilə ümumi dəyəri 52,7 milyon dollar olan layihələr maliyyələşdirilib.
Nəqliyyat və logistika sahəsində əməkdaşlıq Trans-Xəzər Beynəlxalq Nəqliyyat Marşrutu (Orta Dəhliz), "Şərq-Qərb" dəhlizi və Çin-Qırğızıstan-Özbəkistan-Türkmənistan-Azərbaycan-Gürcüstan-Avropa multimodal marşrutu çərçivəsində inkişaf etdirilir. AZAL tərəfindən Bakı–Bişkek və Bakı–İssık-Kul istiqamətlərində müntəzəm aviareyslər həyata keçirilir.
Qırğızıstan Qarabağın bərpasına da dəstək verir. Ağdam rayonunun Xıdırlı kəndində Qırğızıstan hökumətinin maliyyə dəstəyi ilə inşa edilən Ayköl Manas adına tam orta məktəb istifadəyə verilib. Bundan əlavə, Qırğızıstan azad olunmuş ərazilərin inkişafına dəstək məqsədilə Azərbaycana 225 baş yak hədiyyə edib.
Tərəflər Türk Dövlətləri Təşkilatı və digər beynəlxalq platformalarda da sıx əməkdaşlıq edir, regional təhlükəsizlik, iqtisadi inteqrasiya və nəqliyyat layihələri üzrə ortaq mövqedən çıxış edirlər.
