Azərbaycanda 8 ayda 10 milyard manatdan çox kənd təsərrüfatı məhsulu istehsal olunub
Xeberhub.com xəbər verir ki, 2026-cı ilin yanvar-avqust aylarında Azərbaycanda 10 milyard 57,4 milyon manat dəyərində kənd təsərrüfatı məhsulu istehsal edilib.
Dövlət Statistika Komitəsinin məlumatına görə, hesabat dövründə kənd təsərrüfatı məhsullarının fiziki həcm indeksi ötən ilin eyni dövrü ilə müqayisədə 2,6 faiz artıb.
Yanvar-avqust aylarında heyvandarlıq məhsullarının istehsalında 2 faiz, bitkiçilik məhsullarının istehsalında isə 3,1 faiz artım qeydə alınıb.
Ümumi kənd təsərrüfatı məhsullarının istehsalında bitkiçilik və heyvandarlığın payı bərabər olub. Belə ki, istehsalın 50 faizi bitkiçilik, digər 50 faizi isə heyvandarlıq məhsullarının payına düşüb.
Qeyd edək ki, 2026-cı ilin yanvar-iyul aylarında kənd təsərrüfatı məhsullarının fiziki həcm indeksi 2,8 faiz artmışdı. Avqustun sonuna bu göstərici 2,6 faizə düşüb. Eyni dövrdə bitkiçilik üzrə artım tempi 3,2 faizdən 3,1 faizə, heyvandarlıq üzrə isə 2,4 faizdən 2 faizə enib.
