Azərbaycanda uşaqların sosial şəbəkələrdən istifadəsi ilə bağlı nəzərdə tutulan yeni hüquqi tənzimləmələr ictimai müzakirələrə səbəb olub. Məsələ ilə bağlı fikirlərini bölüşən Milli Məclisin deputatı Sevinc Hüseynova bildirib ki, tətbiq olunacaq yaş məhdudiyyəti uşaqların hüquqlarını məhdudlaşdırmaq deyil, onların rəqəmsal mühitdə təhlükəsizliyini gücləndirmək məqsədi daşıyır.
Deputatın sözlərinə görə, yeni qaydalara əsasən, 16 yaşına çatmayan şəxslərin sosial şəbəkələrdə fərdi hesab yaratmasına icazə verilməyəcək. 16–18 yaş arasında olan yeniyetmələrin isə platformalarda qeydiyyatdan keçməsi üçün valideyn və ya qanuni nümayəndənin razılığı tələb oluna bilər.
O qeyd edib ki, dünyanın bir çox ölkəsində oxşar yanaşmalar tətbiq edilir və əsas məqsəd uşaqları internet mühitində rast gəlinən təhlükələrdən qorumaqdır. Bu təhlükələr arasında kiberzorakılıq, şəxsi məlumatların yayılması, rəqəmsal asılılıq və psixoloji təsirlər xüsusi yer tutur.
Deputatın fikrincə, yalnız hüquqi tənzimləmələr kifayət etmir. Valideynlər də övladlarının internetdən istifadəsinə nəzarət etməli, cihazlarda valideyn nəzarəti funksiyalarını aktivləşdirməli və onların onlayn keçirdiyi vaxta diqqət yetirməlidirlər. Rəqəmsal savadlılığın artırılması uşaqların internetdən daha təhlükəsiz istifadə etməsinə kömək edə bilər.
Sevinc Hüseynova bildirib ki, uzun müddət sosial şəbəkələrdə vaxt keçirmək uşaqlarda tənhalıq hissinin, narahatlığın və depressiya riskinin artmasına, həmçinin real ünsiyyətin və fiziki aktivliyin azalmasına səbəb ola bilər. Bundan başqa, şəxsi məlumatların oğurlanması və müxtəlif onlayn təhdidlər də azyaşlılar üçün ciddi risklər yaradır.
Deputat hesab edir ki, yaş məhdudiyyətinin tətbiqi gələcək nəslin sağlam inkişafına, uşaqların təhlükəsiz informasiya mühitində böyüməsinə və rəqəmsal dünyaya daha hazırlıqlı şəkildə inteqrasiya olunmasına xidmət edən önəmli addımdır.
