Hikmət Hacıyev: Qarabağ şəhərləri ilə xarici şəhərlər arasında əməkdaşlıq vacibdir
Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Qarabağ bölgəsinin şəhərləri ilə xarici ölkələrin şəhərləri arasında beynəlxalq əməkdaşlığın genişləndirilməsinin əhəmiyyətini vurğulayıb.
Xeberhub.com xəbər verir ki, Hikmət Hacıyev bu barədə Xankəndidə diplomatik korpusun nümayəndələrinə müraciəti zamanı danışıb.
O bildirib ki, Qarabağ şəhərləri ilə digər ölkələrin şəhərləri arasında birbaşa əlaqələrin və tərəfdaşlıq münasibətlərinin qurulması böyük əhəmiyyət daşıyır.
H.Hacıyev Qarabağ şəhərləri ilə qardaşlıq əlaqələri yaradan ölkələrə və onların şəhərlərinə təşəkkürünü ifadə edib. Onun sözlərinə görə, bu cür münasibətlərin inkişaf etdirilməsi şəhərlər arasında təcrübə və bilik mübadiləsinə imkan yaradır.
Prezidentin köməkçisi şəhərlər arasında birbaşa əməkdaşlığın genişləndirilməsinin vacibliyini qeyd edib və bunun qarşılıqlı təcrübə mübadiləsi baxımından mühüm rol oynadığını bildirib.
H.Hacıyev həmçinin Rumıniyaya təşkil olunan son səfər barədə məlumat verib. O qeyd edib ki, səfər çərçivəsində Rumıniyanın şəhərləri ilə gələcək əməkdaşlığın inkişaf etdirilməsi istiqamətində ilk əlaqələr qurulub.
