İqlim dəyişikliyi nəticəsində ekstremal hava hadisələrinin, xüsusilə isti hava dalğalarının daha tez-tez və daha güclü şəkildə müşahidə olunduğu bildirilir.
XeberHub.com xəbər verir ki, "RİA Novosti" agentliyinə müsahibəsində İtaliyanın Kamerino Universitetinin fiziki coğrafiya və iqlim riskləri üzrə müəllimi Massimiliano Fazzini bu tendensiyanın iqlim dəyişikliklərinin əsas göstəricilərindən biri olduğunu deyib.
Ekspert bildirib ki, son illərdə Mərkəzi Avropada hər isti mövsüm ərzində orta hesabla 5-7 isti hava dalğası qeydə alınır. Onun sözlərinə görə, bu dalğaların davametmə müddəti əvvəlki illərlə müqayisədə ciddi dəyişməyərək təxminən 6-7 gün təşkil edir.
Massimiliano Fazzini qeyd edib ki, iqlim sürətlə dəyişir və bu proses özünü ilk növbədə ekstremal hava hadisələrinin artması ilə göstərir. O bildirib ki, son 50 il ərzində Şərqi Avropada orta temperatur təxminən 0,5 dərəcə yüksəlib.
İqlimşünasın sözlərinə görə, insanlar orta temperaturdakı kiçik dəyişiklikləri gündəlik həyatda hiss etməsələr də, müşahidələr isti hava dalğalarının həm tezliyinin, həm də intensivliyinin artdığını açıq şəkildə göstərir.
