İstanbulda sərnişin avtobusunun iştirakı ilə baş verən yol-nəqliyyat hadisəsi nəticəsində azı 30 nəfər xəsarət alıb.
XeberHub.com xəbər verir ki, TRT Haber-in yaydığı məlumata görə, qəza səhər saatlarında İstanbulun Avropa hissəsində yerləşən Eyüpsultan rayonunda baş verib.
İlkin məlumata əsasən, yağış səbəbindən sürüşkən olan yolda avtobusun sürücüsü idarəetməni itirib. Nəticədə nəqliyyat vasitəsi əvvəlcə qarşıda hərəkət edən avtomobilə, daha sonra isə yol nişanının yerləşdiyi dirəyə çırpılıb.
Məlumata görə, hadisə zamanı azı 30 nəfər müxtəlif dərəcəli xəsarətlər alıb. Yaralılardan ikisinin vəziyyətinin ağır olduğu bildirilir. İstanbul Böyükşəhər Bələdiyyəsi xəsarət alanların hamısının yerli vətəndaşlar olduğunu, onların arasında uşaqların da yer aldığını açıqlayıb.
Bundan əlavə, iyulun 25-nə keçən gecə Türkiyənin Kırıkkale vilayətində də daha bir ağır avtobus qəzası qeydə alınıb. Pis hava şəraiti səbəbindən sürücünün idarəetməni itirməsi nəticəsində avtobus Kırıkkale–Çorum magistralından çıxaraq aşıb. Yerli qurumlar hadisə nəticəsində 40 nəfərin yaralandığını, xəsarət alanlar arasında əcnəbi vətəndaşların olmadığını təsdiqləyiblər.
