ABŞ Müdafiə Nazirliyinin (Pentaqon) rəsmi platformasında İranla münaqişə zamanı həlak olan hərbçilərlə bağlı statistik məlumatların düzgün əks olunmaması Vaşinqtonda müzakirələrə səbəb olub.
XeberHub.com xəbər verir ki, CNN-in yaydığı məlumata görə, ABŞ Senatında Demokratlar Partiyasını təmsil edən senatorlar Pentaqon rəhbəri Pit Heqsetdən məsələ ilə bağlı təcili izahat verməsini tələb ediblər.
Məlumata əsasən, İranla qarşıdurma zamanı itkiləri qeydə alan ABŞ Müdafiə Nazirliyinin Hərbi İtkilərin Təhlili Sistemi (DCAS) təxminən bir sutkadır qeyri-dəqiq statistika nümayiş etdirir.
Bildirilir ki, iyulun 23-də sistemdən həlak olmuş dörd hərbçi və onlarla yaralı barədə məlumat silinib. Halbuki bundan əvvəl rəsmi statistikada münaqişə zamanı həyatını itirən ABŞ hərbçilərinin sayının 18 olduğu göstərilmişdi. CNN xatırladır ki, Prezident Donald Tramp da Delaver ştatında hərbçilərin cənazələrinin qarşılanması mərasimində məhz bu rəqəmi təsdiqləmişdi.
Yaranmış vəziyyətlə əlaqədar Senatdakı demokratlar Pit Heqsetə rəsmi məktub göndərərək hadisənin səbəblərinin açıqlanmasını istəyiblər.
Pentaqonun sözçüsü Şon Parnell isə "X" sosial şəbəkəsində paylaşdığı açıqlamada nazirliyin saytda yaranan texniki problemlərdən xəbərdar olduğunu bildirib. Onun sözlərinə görə, nasazlıqların aradan qaldırılması istiqamətində iş aparılır və itkilərin qəsdən gizlədilməsi ilə bağlı iddialar həqiqəti əks etdirmir.
CNN qeyd edir ki, DCAS platformasında zaman-zaman texniki nasazlıqlar müşahidə olunur və bu səbəbdən statistik göstəricilər dəyişə bilir. Bundan əlavə, Pentaqon yaralılarla bağlı məlumatların gec yenilənməsini tibbi qiymətləndirmə prosesinin davam etməsi ilə izah edir. Bu proses bir neçə gündən bir neçə həftəyədək davam edə bilər.
