Xeberhub.com xəbər verir ki, Oxu.az-ın yaydığı məlumata əsasən, UEFA Konfrans Liqasının II təsnifat mərhələsinin ilk oyununda Azərbaycanın "Neftçi" klubu doğma meydanda Belarusun "Dinamo" (Minsk) komandasını qəbul edib. "Palms Sports Arena"da keçirilən qarşılaşma qonaqların 4:2 hesablı qələbəsi ilə başa çatıb.
Matça uğurlu başlayan "ağ-qaralar" hesabı artıq 2-ci dəqiqədə açıblar. Komandanın kapitanı Emin Mahmudov dəqiq zərbə ilə komandasını önə keçirib. Cəmi altı dəqiqə sonra isə "Dinamo"nun futbolçusu Aleksandr Selyava avtoqol edərək Bakı təmsilçisinin üstünlüyünü iki topa çatdırıb.
İlk hissənin 36-cı dəqiqəsində Karen Vardanyan fərqi minimuma endirib və fasiləyə komandalar 2:1 hesabı ilə yollanıblar.
İkinci hissənin əvvəlində, 47-ci dəqiqədə Yevgeni Malaşeviç hesabı bərabərləşdirib. Daha sonra 57-ci dəqiqədə Karen Vardanyan ikinci qolunu vuraraq Belarus klubunu hesabda önə çıxarıb.
Matçın 77-ci dəqiqəsində "Dinamo" penalti hüququ qazanıb. Gulzigit Alykulovun ilk zərbəsini qapıçı Rza Cəfərov dəf etsə də, futbolçu topu təkrar qapıya göndərərək hesabı 4:2 edib və görüşün yekun nəticəsini müəyyənləşdirib.
Komandalar arasında cavab görüşü iyulun 30-da keçiriləcək. Bu cütün qalibi UEFA Konfrans Liqasının növbəti təsnifat mərhələsində Serbiyanın "Jelezniçar" və Portuqaliyanın "Braqa" komandaları arasında keçiriləcək qarşılaşmanın qalibi ilə üz-üzə gələcək.
