Ermənistanın Aİİ-dən uzaqlaşması yeni geosiyasi mərhələnin başlanğıcıdır?
Xeberhub.com xəbər verir ki, Ermənistanın Baş naziri Nikol Paşinyan Avrasiya İqtisadi İttifaqını (Aİİ) "iflic vəziyyətdə olan qurum" adlandıraraq ölkəsinin alternativ xarici-iqtisadi istiqamətlər axtardığını bəyan edib.
Ekspertlərin fikrincə, bu açıqlama son illərdə İrəvanla Moskva arasında münasibətlərdə müşahidə olunan gərginliyin növbəti göstəricisidir. Xüsusilə 2018-ci ildən sonra Ermənistanın Qərblə yaxınlaşma siyasəti sürətlənib və ölkə Avropa İttifaqı ilə inteqrasiyanı prioritet istiqamətlərdən biri kimi müəyyənləşdirib.
Bununla belə, Ermənistanın yaxın perspektivdə Avropa İttifaqına tamhüquqlu üzv olması real görünmür. Bildirilir ki, Aİ-yə üzvlük üçün uzunmüddətli hüquqi, iqtisadi və institusional islahatlar tələb olunur. Bundan əlavə, Ermənistan iqtisadiyyatının əhəmiyyətli hissəsi hələ də Rusiya bazarı, enerji resursları və maliyyə axınlarından asılıdır.
Qeyd olunur ki, Aİ-nin Kopenhagen meyarlarına uyğun olaraq namizəd ölkələr demokratiya, qanunun aliliyi, insan hüquqları və institusional islahatlar sahəsində ciddi tələbləri yerinə yetirməlidir. Ermənistanın isə bu istiqamətlərdə hələ də mühüm islahatlara ehtiyacı olduğu bildirilir.
Mütəxəssislər vurğulayırlar ki, Ermənistan eyni vaxtda həm Avrasiya İqtisadi İttifaqının, həm də Avropa İttifaqının tamhüquqlu üzvü ola bilməz. Çünki hər iki iqtisadi blokun gömrük və ticarət siyasətləri arasında hüquqi ziddiyyətlər mövcuddur.
Ekspertlər hesab edirlər ki, Ermənistanın Qərblə yaxınlaşma siyasəti Cənubi Qafqazda geosiyasi balansı dəyişə bilər. Bununla yanaşı, Azərbaycan üçün əsas prioritetin regionda davamlı sülhün təmin olunması, kommunikasiyaların açılması və Ermənistanın üzərinə götürdüyü öhdəlikləri praktikada yerinə yetirməsi olduğu vurğulanır.
