Xeberhub.com xəbər verir ki, Oxu.Az-ın TASS-a istinadən yaydığı məlumata görə, Rusiyada əcnəbi vətəndaşların ölkədən çıxarılmasına əsas verən qanun pozuntularının sayı genişləndirilib.
Rusiya Dövlət Dumasının qəbul etdiyi yeni qanunla deportasiya tətbiq edilə biləcək hallar İnzibati Xətalar Məcəlləsinin 22 maddəsindən 45 maddəsinə qədər artırılıb.
Dövlət Dumasının sədri Vyaçeslav Volodin bildirib ki, bundan sonra miqrantların ölkədən çıxarılması yalnız miqrasiya qaydalarının pozulması ilə məhdudlaşmayacaq. Yeni qaydalara əsasən, narkotik vasitələrin qanunsuz dövriyyəsi, azyaşlılarla bağlı ağır cinayətlər, ictimai əxlaq normalarına zidd təbliğat, dövlət sərhədi rejiminin pozulması kimi hallar da deportasiya səbəbi sayılacaq.
Volodinin sözlərinə görə, əcnəbilər polis əməkdaşlarının və sərhəd xidmətinin nümayəndələrinin qanuni tələblərinə əməl etmədikdə, ictimai asayişi pozduqda, internetdə insan ləyaqətini alçaldan materiallar yaydıqda və digər qanun pozuntularına yol verdikdə ölkədən çıxarıla bilərlər.
Bundan əlavə, Rusiya Silahlı Qüvvələrinin fəaliyyətini gözdən salan hərəkətlər, dövlətə və müəssisələrə qarşı sanksiyaların tətbiqinə çağırışlar və ayrı-seçkilik xarakterli fəaliyyətlər də deportasiya üçün əsas kimi müəyyən edilib.
Qeyd edək ki, Vyaçeslav Volodin 2024-cü ilin əvvəlindən Dövlət Dumasının miqrasiya siyasətinin təkmilləşdirilməsi istiqamətində 32 federal qanun qəbul etdiyini bildirib.
