“San-Paulu”nun səfər üçün nəzərdə tutulan avtobusunda 86 kq marixuana aşkarlandı
Braziliyanın “San-Paulu” futbol klubunun Boliviyadakı səfərləri zamanı istifadə etməsi planlaşdırılan avtobusda 86,5 kiloqram marixuana aşkarlanıb.
Xeberhub.com xəbər verir ki, bu barədə UOL məlumat yayıb.
Hadisə Braziliya təmsilçisinin Cənubi Amerika Kubokunun 1/8 final mərhələsində Boliviyanın “Bolivar” klubu ilə qarşılaşması üçün ölkəyə səfəri zamanı baş verib. Avtobus Boliviyanın Koçabamba departamentində, Lokotal ərazisində polis tərəfindən yoxlanılıb.
Yoxlama zamanı nəqliyyat vasitəsində dörd kisənin içərisində gizlədilmiş çoxsaylı bağlamalar aşkarlanıb. Araşdırma nəticəsində bağlamalarda ümumi çəkisi 86,5 kiloqram olan marixuana olduğu müəyyənləşdirilib.
Əməliyyat zamanı avtobusun üç sürücüsü saxlanılıb. Hazırda narkotikin mənşəyi və daşınmasında digər şəxslərin iştirak edib-etmədiyi araşdırılır.
Məlumata görə, avtobus “San-Paulu” klubunun Boliviyadakı səfəri üçün yerli “Buses Cosmos” şirkətindən sifariş edilib. Lakin klubun nümayəndələri bildiriblər ki, komandanın bu nəqliyyat vasitəsi ilə heç bir əlaqəsi olmayıb. Şirkət hadisədən sonra komandanın istifadəsi üçün başqa avtobus ayırıb.
Beləliklə, hadisə “San-Paulu”nun oyunla bağlı logistikasına təsir göstərməyib. Komanda Boliviyanın “Bolivar” klubu ilə səfər oyununa hazırlığını davam etdirib.
