Xeberhub.com Oxu.Az-a istinadən xəbər verir ki, İsrail Müdafiə Qüvvələri (SAXAL) Qəzza bölgəsində nəzarət etdiyi əraziləri ayırmaq məqsədilə xüsusi torpaq maneə inşa edir.
Məlumata görə, bu barədə "Associated Press" agentliyi İsrail hərbi qurumunun rəsmi açıqlamasına əsasən məlumat yayıb.
Bildirilib ki, maneə HƏMAS qruplaşması ilə oktyabr ayında əldə olunan atəşkəs razılaşmasından sonra İsrail qüvvələrinin geri çəkildiyi və "sarı xətt" adlandırılan sərhəd boyunca tikilir.
Agentliyin məlumatına əsasən, ilkin mərhələdə sözügedən xəttin müvəqqəti xarakter daşıyacağı ehtimal edilirdi. Planlara görə, İsrail qüvvələrinin gələcəkdə ərazidən daha da geri çəkilməsi nəzərdə tutulurdu.
SAXAL-ın fəaliyyəti yalnız maneənin tikintisi ilə məhdudlaşmır. İsrail ordusu eyni zamanda "sarı xətt" boyunca xüsusi texnika ilə təmin edilmiş təhlükəsizlik zolağı yaradır.
İsrail hərbi idarəsindən bildirilib ki, sərhəd bölgəsində müdafiə imkanlarının gücləndirilməsi üçün kompleks tədbirlər həyata keçirilir.
SAXAL sözçüsünün açıqlamasına görə, inşa edilən maneə İsrail hərbçilərinin və Qəzza sektoruna yaxın ərazilərdə yaşayan sakinlərin təhlükəsizliyini təmin etmək, eləcə də sərhədi qanunsuz keçmək cəhdlərinin qarşısını almaq məqsədi daşıyır.
