Xeberhub.com xəbər verir ki, Sumqayıtda yerləşən "Levent 2" yaşayış kompleksinin sakinləri binanın aşağı mərtəbəsində mərasim evinin fəaliyyətə başlamasına etiraz edirlər.
Sakin Könül Əhmədova bildirib ki, yaşayış binasında yas mərasimlərinin keçirilməsi xüsusilə uşaqların psixoloji durumuna mənfi təsir göstərə bilər. Onun sözlərinə görə, obyektin sahəsi 500 kvadratmetrdən artıqdır və burada hər gün yüzlərlə insanın toplaşması gözlənilir.
Digər sakin Şirinbəyim Əhmədova isə mərasim evinin fəaliyyətinin binada yaşayanların rahatlığını pozacağını düşünür. O bildirib ki, yas mərasimləri zamanı yaranacaq səs-küy və izdiham sakinlər üçün narahatlıq yaradacaq.
Obyektin sahibi Namiq Dövlətov isə səsləndirilən narazılıqlarla razılaşmayıb. O deyib ki, mərasimlər zamanı heç bir ağlaşmaya və səs-küyə icazə verilməyəcək, obyekt səs izolyasiyası ilə təmin olunub və bütün fəaliyyət qanunvericiliyə uyğun şəkildə təşkil ediləcək.
Sahibkar həmçinin qeyd edib ki, istifadə olunan lift parkinq üçün deyil, binanın birinci və ikinci mərtəbələri arasında hərəkət etmək məqsədilə quraşdırılıb. Onun sözlərinə görə, obyektin fəaliyyəti üçün bütün müvafiq dövlət qurumlarından lazımi icazələr alınıb.
Sumqayıt Şəhər İcra Hakimiyyətindən bildirilib ki, sözügedən yaşayış kompleksi Dövlət Mənzil Fonduna aid deyil. Qeyd olunub ki, özəl yaşayış binalarında ümumi əmlakın istifadəsi və idarə olunması ilə bağlı məsələlər qanunvericiliyə əsasən mənzil mülkiyyətçilərinin ümumi yığıncağı və ya idarəedici qurum tərəfindən tənzimlənir.
Şərhlər (0)
Şərh yazın