Xeberhub.com xəbər verir ki, "Wildberries" və "Russ" (RWB) şirkətlər qrupunun yaydığı məlumata əsasən, Rusiyanın Yekaterinburq şəhərində yerləşən logistika mərkəzində pilotsuz uçuş aparatının (PUA) hücumundan sonra yanğın baş verib.
Şirkətin açıqlamasında bildirilib ki, hadisə zamanı əraziyə yanğınsöndürmə briqadaları cəlb olunub və alovun söndürülməsi istiqamətində tədbirlər görülüb. Eyni zamanda, obyekt əməkdaşları vaxtında təxliyə edildiyindən təhlükəsizlik təmin olunub.
Məlumata görə, insidentdən sonra logistika mərkəzində yüklərin qəbulu müvəqqəti dayandırılıb. Qəbul edilməli olan yüklər isə şirkətin digər logistika mərkəzlərinə yönləndirilib.
Hadisənin səbəbləri və mümkün zərərin həcmi ilə bağlı əlavə məlumat verilməyib.
