Xeberhub.com xəbər verir ki, Oxu.az-ın yaydığı məlumata görə, UEFA Konfrans Liqasında çıxış edən Azərbaycan təmsilçisi "Zirə" bu gün II təsnifat mərhələsinin ilk oyununda Estoniyanın "Payde" komandası ilə üz-üzə gələcək.
Qarşılaşma Estoniyanın Payde şəhərində yerləşən eyniadlı stadionda keçiriləcək. Görüş Bakı vaxtı ilə saat 20:00-da başlayacaq.
"Zirə" turnirin əvvəlki mərhələsində Gürcüstanın "Torpedo Kutaisi" klubunu hər iki oyunda 3:0 hesabı ilə məğlub edərək növbəti raunda yüksəlib.
Estoniya təmsilçisi "Payde" isə I təsnifat mərhələsində Litvanın "Hegelman" komandası ilə qarşılaşıb. İlk görüş 1:1 hesabı ilə başa çatsa da, cavab matçında "Payde" 3:0 hesablı qələbə qazanaraq mərhələ adlayıb.
Komandalar arasında cavab qarşılaşması iyulun 30-da Bakıda keçiriləcək. İki oyunun nəticəsinə əsasən qalib gələn tərəf UEFA Konfrans Liqasının növbəti mərhələsinə vəsiqə qazanacaq.
