Xeberhub.com xəbər verir ki, Azərbaycanda sabah bəzi bölgələrdə havanın temperaturunun 40 dərəcəyədək yüksələcəyi proqnozlaşdırılır.
Milli Hidrometeorologiya Xidmətinin məlumatına görə, Bakıda və Abşeron yarımadasında hava əsasən yağmursuz keçəcək. Şimal-qərb küləyinin bəzi vaxtlarda güclənəcəyi gözlənilir.
Paytaxt və yarımadada gecə temperaturu 21-26 dərəcə isti, gündüz isə 28-32 dərəcə isti olacaq. Atmosfer təzyiqi 754-757 mm civə sütunu arasında dəyişəcək. Nisbi rütubətin gecə 70-80 faiz, gündüz isə 50-60 faiz olacağı bildirilir.
Ölkənin rayonlarında da havanın əsasən açıq keçəcəyi gözlənilir. Bununla yanaşı, günün ikinci yarısında bəzi dağlıq və dağətəyi ərazilərdə qısamüddətli leysan yağışları, şimşək və dolu ehtimalı var. Ayrı-ayrı dağlıq ərazilərdə gecə və səhər saatlarında duman müşahidə oluna bilər.
Bölgələrdə havanın temperaturu gecə 21-26 dərəcə, gündüz 35-38 dərəcə isti olacaq. Bəzi yerlərdə temperaturun 40 dərəcəyə çatacağı, dağlıq ərazilərdə isə gündüz 24-29 dərəcə isti olacağı gözlənilir.
