Emin Hüseynovun iştirak etdiyi yeni media layihəsi Azərbaycanla bağlı səsləndirilən fikirlərə görə müzakirələrə səbəb olub.
XeberHub.com xəbər verir ki, Baku TV-nin videomaterialına istinadən, Emin Hüseynov bu dəfə Ovsep Xurşudyanla birgə başladığı layihə ilə gündəmə gəlib.
Məlumata görə, layihənin ilk qonağı jurnalist David Stepanyan olub. Veriliş zamanı Azərbaycanın daxili siyasi vəziyyəti, Ermənistanla münasibətlər, Qərbi Azərbaycan mövzusu və Qarabağla bağlı müxtəlif fikirlər səsləndirilib.
Baku TV-nin təqdim etdiyi materialda bildirilir ki, Emin Hüseynov və həmsöhbətləri Azərbaycanda demokratiya ilə bağlı tənqidi mövqe nümayiş etdiriblər, Ermənistanın siyasi sistemi barədə isə müsbət fikirlər səsləndiriblər.
Videomaterialda həmçinin qeyd olunur ki, müzakirələr zamanı Ermənistanda müxalifət nümayəndələrinin saxlanılması, eləcə də revanşist çağırışlar və separatçı simvollardan istifadə kimi məsələlərə toxunulmayıb.
Baku TV süjetində David Stepanyanın Qarabağdakı erməni kilsələri ilə bağlı səsləndirdiyi iddialara da yer verilib. Materialda qeyd olunur ki, Azərbaycan tərəfinin mövqeyinə əsasən, işğal dövründə Azərbaycanın razılığı olmadan inşa edilən tikililər beynəlxalq hüquq çərçivəsində qanunsuz hesab edilir.
Süjetdə həmçinin vurğulanır ki, uzun illər işğal altında qalmış Azərbaycan ərazilərində məscidlərin, qəbiristanlıqların, yaşayış evlərinin və mədəni irs nümunələrinin dağıdılması məsələsi müzakirədə gündəmə gətirilməyib.
