DYP-dən həftəsonu səfərə çıxan sürücülərə mühüm xəbərdarlıq
Xeberhub.com xəbər verir ki, Baş Dövlət Yol Polisi İdarəsi həftəsonu və yay mövsümü ilə əlaqədar respublikanın avtomobil yollarında nəqliyyat axınının artacağını bildirərək yol hərəkəti iştirakçılarına müraciət edib.
Qurumun məlumatına görə, xüsusilə paytaxtdan bölgələrə, turizm və istirahət mərkəzlərinə, eləcə də dənizkənarı ərazilərə gedən yollarda hərəkət intensivliyinin əhəmiyyətli dərəcədə yüksələcəyi gözlənilir.
Baş Dövlət Yol Polisi İdarəsi qeyd edib ki, nəqliyyat sıxlığının artması yol-nəqliyyat hadisələrinin başvermə riskini də yüksəldir. Bu səbəbdən bütün sürücülər və piyadalar diqqətli, məsuliyyətli və yol hərəkəti qaydalarına ciddi əməl etməyə çağırılıb.
Sürücülərə tövsiyə olunur ki, hərəkət sürətini yol və hava şəraitinə uyğun seçsinlər, uzun məsafəyə çıxmazdan əvvəl kifayət qədər istirahət etsinlər, yorğun və yuxusuz halda avtomobil idarə etməsinlər. Həmçinin təhlükəsiz ara məsafəsini qorusunlar, riskli ötmələrdən və təhlükəli manevrlərdən çəkinsinlər, yol nişanları və digər hərəkətin təşkili vasitələrinin tələblərinə əməl etsinlər, səfərdən əvvəl nəqliyyat vasitəsinin texniki sazlığını yoxlasınlar.
DYP dənizkənarı və digər istirahət zonalarına üz tutan piyadalara da müraciət edərək, yolda mobil telefondan və diqqəti yayındıran vasitələrdən istifadə etməməyi, yalnız piyada keçidlərindən keçməyi tövsiyə edib.
Qurum vurğulayıb ki, çimərliklər və istirahət məkanlarının ətrafında nəqliyyatın intensivliyi nəzərə alınaraq həm sürücülər, həm də piyadalar qarşılıqlı diqqət və ehtiyatlılıq nümayiş etdirməlidirlər.
Baş Dövlət Yol Polisi İdarəsi vətəndaşları təhlükəsiz səfər üçün yol hərəkəti qaydalarına riayət etməyə, özlərinin və digər hərəkət iştirakçılarının həyatını riskə atmamağa çağırıb.
