Fransada meşə yanğınları 35 min hektarı əhatə edib

Fransada meşə yanğınları genişlənir: 35 min hektardan çox ərazi alovlara təslim olub

Xeberhub.com xəbər verir ki, Fransada davam edən anomal istilər ölkənin müxtəlif bölgələrində meşə yanğınlarının sürətlə yayılmasına səbəb olub. Hazırda alovların əhatə etdiyi ərazi təxminən 35 min hektara çatıb.

Məlumata görə, bu il ölkədə artıq 11 min meşə yanğını qeydə alınıb. Müqayisə üçün qeyd edilir ki, 2025-ci ilin yanğın mövsümündə ümumilikdə 15 min yanğın baş vermiş və həmin hadisələr nəticəsində 30 min hektar ərazi zərər görmüşdü.

Fransanın mülki müdafiə xidmətinin rəhbəri Jülyen Maryon bildirib ki, son üç həftə ərzində yanğınsöndürmə briqadaları ölkə üzrə eyni vaxtda 250-300 yanğın ocağı ilə mübarizə aparır.

Onun sözlərinə görə, hazırda Fransanın təxminən 50 departamentində meşə yanğınlarının baş verməsi riski yüksək olaraq qiymətləndirilir.

Son günlərdə Parisin cənub-şərqində yerləşən məşhur Fontenblo meşəsində də genişmiqyaslı yanğın qeydə alınıb. Alovun yayılması nəzarət altına alınsa da, 2 min hektardan artıq ərazini əhatə edən yanğının tam söndürülməsinin bir neçə həftə çəkə biləcəyi bildirilir.