Xeberhub.com xəbər verir ki, Milli Məclisin deputatı Mehriban Vəliyeva rəqəmsal texnologiyaların sürətli inkişafı fonunda uşaqların və yeniyetmələrin sosial media platformalarında qarşılaşdığı risklərin artdığını bildirib.
Deputatın sözlərinə görə, internet və sosial şəbəkələr təhsil, ünsiyyət və informasiya əldə etmək baxımından geniş imkanlar yaratsa da, eyni zamanda azyaşlılar üçün psixoloji, mənəvi və təhlükəsizlik baxımından ciddi təhdidlər formalaşdırır. O qeyd edib ki, məhz bu səbəbdən dünyanın bir çox ölkəsində uşaqların sosial şəbəkələrdən istifadəsinə yaş məhdudiyyətləri və müxtəlif hüquqi mexanizmlər tətbiq edilir.
Mehriban Vəliyeva bildirib ki, Azərbaycan da bu istiqamətdə beynəlxalq təcrübəni nəzərə alaraq uşaqların hüquqlarının qorunmasını dövlət siyasətinin əsas prioritetlərindən biri kimi müəyyənləşdirib. Onun sözlərinə görə, son illərdə qəbul edilən qanunvericilik dəyişiklikləri və institusional islahatlar azyaşlıların təhlükəsiz informasiya mühitində böyüməsinə, kibertəhlükələrdən qorunmasına və sağlam inkişafına xidmət edir.
Deputat vurğulayıb ki, sosial media platformaları artıq təkcə ünsiyyət vasitəsi deyil, həm də dezinformasiya, kibercinayət, psixoloji təsir, şəxsi məlumatların oğurlanması və müxtəlif qanunsuz fəaliyyətlər üçün istifadə oluna bilən mühitə çevrilib. O əlavə edib ki, bir çox inkişaf etmiş ölkələrdə yaşın təsdiqlənməsi sistemləri, valideyn nəzarəti və uşaqların şəxsi məlumatlarının qorunmasına dair ciddi hüquqi mexanizmlər tətbiq olunur.
Mehriban Vəliyevanın fikrincə, Azərbaycanın yanaşması da uşaqları rəqəmsal mühitdən uzaqlaşdırmağa deyil, onların təhlükəsiz şəkildə internetdən istifadə etməsini təmin etməyə yönəlib. O qeyd edib ki, azyaşlıların zorakılıq, kibertəqib, saxta profillər, narkotik vasitələrin təbliği, qumar elementləri, insan alveri və cinsi istismar kimi təhlükələrdən qorunması dövlətin əsas vəzifələrindən biridir.
Deputat xatırladıb ki, Azərbaycan Konstitusiyası, "Uşaq hüquqları haqqında" Qanun, eləcə də uşaqların zərərli informasiyadan qorunması və kibertəhlükəsizlik sahəsində qəbul olunmuş normativ sənədlər bu istiqamətdə vahid dövlət siyasətinin formalaşdırılmasına xidmət edir. Onun sözlərinə görə, sosial şəbəkələrdən istifadə ilə bağlı müəyyən yaş həddinin müəyyənləşdirilməsi uşaqların hüquqlarının məhdudlaşdırılması deyil, onların daha etibarlı müdafiəsinə yönəlmiş preventiv tədbirdir.
Mehriban Vəliyeva əlavə edib ki, uşaqların təhlükəsiz internetdən istifadəsi yalnız qanunvericiliklə deyil, həm də ailə institutunun möhkəmləndirilməsi, valideyn məsuliyyətinin artırılması, məktəb-valideyn əməkdaşlığının gücləndirilməsi və rəqəmsal savadlılığın yüksəldilməsi ilə mümkün ola bilər. O bildirib ki, bu istiqamətdə həyata keçirilən dövlət siyasəti sağlam, bilikli və milli-mənəvi dəyərlərə sadiq gənc nəslin formalaşdırılmasına xidmət edir.
