Fransada geniş əraziləri əhatə edən meşə yanğınları "Tour de France" velosiped yarışının son mərhələsinin marşrutunda dəyişiklik edilməsinə səbəb olub.
XeberHub.com xəbər verir ki, Paris Polis Prefekturasının yaydığı məlumata görə, təhlükəsizlik qüvvələrinin bir hissəsinin yanğın bölgələrinə göndərilməsi ilə əlaqədar yarışın 21-ci mərhələsinin məsafəsi qısaldılıb.
Məlumata əsasən, Daxili İşlər Nazirliyinin qərarı ilə əvvəlcə 133 kilometr nəzərdə tutulan mərhələ 89 kilometrə endirilib. Yeni marşruta uyğun olaraq velosipedçilər Parisdə Monmartr təpəsində finiş xəttinə çatmazdan əvvəl Yelisey çöllərində əlavə iki dövrə vuracaqlar.
Fransanın daxili işlər naziri Loran Nünes bildirib ki, 2026-cı ilin əvvəlindən bəri ölkədə yanğınların əhatə etdiyi ərazi təxminən 100 min hektara çataraq rekord göstərici qeydə alıb. Ən ağır vəziyyətin Jironda və Land departamentlərində yaşandığı, bu bölgələrdən ümumilikdə 197 min nəfərin təxliyə edildiyi bildirilib.
Prezident Emmanuel Makron yanğınların söndürülməsinə hərbçilərin cəlb olunması barədə göstəriş verib. Bundan əlavə, 20 min litr su daşımaq imkanına malik eksperimental avadanlıqla təchiz edilmiş Airbus A400M hərbi-nəqliyyat təyyarəsi də əməliyyatlara qoşulub.
