Xeberhub.com xəbər verir ki, Argentina millisinin kapitanı Lionel Messi dünya çempionatının final oyunu öncəsi komanda yoldaşlarına və azarkeşlərə müraciət edib.
Təcrübəli futbolçu sosial şəbəkə hesablarında etdiyi paylaşımda Argentina yığmasının artıq unudulmaz bir tarix yazdığını vurğulayıb.
Messi bildirib ki, komandanın uğuru yalnız qazanılan titullarla ölçülmür, əsas dəyər keçilən yol, birlik və mübarizə ruhudur.
"Bu illər ərzində ən gözəl şey yalnız titullar deyil, həm də keçdiyimiz bütün yol oldu. Hər gün bu komandanın yanında olmaq, birlikdə mübarizə aparmaq, çətin anlardan sonra ayağa qalxmaq və hər addımdan zövq almaq xüsusi hissdir", – deyə Messi qeyd edib.
Argentina millisinin lideri komanda yoldaşlarına, məşqçilər heyətinə və yığmanın uğuru üçün çalışan bütün şəxslərə təşəkkürünü bildirib.
"Nə baş verirsə versin, bu komanda artıq heç vaxt unutmayacağımız və heç kimin silə bilməyəcəyi bir tarix yazıb. İrəli, Argentina!" – deyə Messi əlavə edib.
Qeyd edək ki, futbol üzrə dünya çempionatının finalında Argentina və İspaniya milliləri qarşılaşacaq. Həlledici oyun bu gün Bakı vaxtı ilə saat 23:00-da başlayacaq.
