Tramp: İran hələ də raket və PUA imkanlarını qoruyub saxlayır
Xeberhub.com xəbər verir ki, TASS-ın məlumatına görə, ABŞ Prezidenti Donald Tramp İranın ABŞ ordusunun həyata keçirdiyi zərbələrə baxmayaraq, müəyyən hərbi imkanlarını saxladığını bildirib.
Tramp jurnalistlərə açıqlamasında qeyd edib ki, Tehran hələ də raket ehtiyatlarına, pilotsuz uçuş aparatlarına və məhdud da olsa, silah istehsalı imkanlarına malikdir.
“Onların müəyyən sayda raketləri var. Bir qədər dron ehtiyatları mövcuddur. Həmçinin çox böyük olmasa da, müəyyən istehsal imkanlarını qoruyurlar”, – deyə ABŞ lideri bildirib.
Ağ Ev rəhbəri əlavə edib ki, ABŞ Hörmüz boğazına nəzarət edir, İranın isə bu istiqamətdə təsir imkanları yoxdur.
Tramp gələcək vəziyyətin necə inkişaf edəcəyinin məlum olmadığını vurğulayıb və İran ərazisinə yeni zərbələrin endiriləcəyini açıqlayıb.
“Bu gecə İrana yenidən çox sarsıdıcı zərbə endirəcəyik”, – deyə ABŞ Prezidenti bildirib.
