Siyasi şərhçi: Ukrayna hökumətinin istefası gözlənilən addım idi
Xeberhub.com xəbər verir ki, siyasi şərhçi Zaur İbrahimli Ukrayna hökumətində baş verən dəyişiklikləri və ölkənin siyasi kursunu şərh edib.
Onun sözlərinə görə, Ukrayna hökumətinin istefası gözlənilən proses idi. O qeyd edib ki, əvvəlki hökumətin fəaliyyəti korrupsiya ilə bağlı qalmaqallar səbəbindən ciddi tənqidlərə məruz qalırdı.
Siyasi şərhçi bildirib ki, Ukrayna Prezidenti Volodimir Zelenski yaranmış vəziyyətə uyğun olaraq yeni komanda formalaşdırmağa çalışır. Onun fikrincə, bu addım həm daxili çağırışlara cavab, həm də Qərbdən gələn reaksiyalara çevik yanaşma kimi qiymətləndirilə bilər.
Zaur İbrahimli müdafiə nazirinin istefası məsələsində fərqli yanaşmaların olduğunu vurğulayıb. O bildirib ki, bəzi ekspertlər bu qərarı Zelenskinin siyasi manevri kimi qiymətləndirir, digər tərəf isə hərbi rəhbərliyin mövqeyinin nəzərə alınmasının vacib olduğunu düşünür.
Şərhçi əlavə edib ki, Avropanın aparıcı dövlətləri Ukraynaya dəstək məsələsində əsasən vahid mövqedən çıxış edir. Böyük Britaniya, Fransa və Almaniyanın Ukraynaya müxtəlif istiqamətlərdə yardım göstərdiyini qeyd edən İbrahimli bildirib ki, bəzi Mərkəzi və Şərqi Avropa ölkələri isə Rusiya-Ukrayna müharibəsində diplomatik həll yollarını daha çox dəstəkləyir.
Onun sözlərinə görə, Avropa İttifaqı ölkələri Ukraynanın ərazi bütövlüyü məsələsində ortaq mövqeyə malikdir. Mövcud fikir ayrılıqları isə əsasən geosiyasi maraqlar və müharibədən sonrakı dövrdə qüvvələr balansının formalaşması ilə bağlıdır.
Siyasi şərhçi bildirib ki, "İstəklilər koalisiyası"nın yaradılması Ukraynaya dəstəyin strateji istiqamət kimi qəbul edildiyini göstərir. O qeyd edib ki, Kiyevə maliyyə və hərbi yardım göstərilməsi ilə bağlı mühüm qərarlar qəbul olunub.
İbrahimli Rusiyaya qarşı Ukraynanı dəstəkləyən beynəlxalq tərəfdaşlığın formalaşdığını da diqqətə çatdırıb. O bildirib ki, ABŞ və Avropa ölkələri arasında müəyyən məsələlərdə fərqli yanaşmalar olsa da, Ukraynanın müdafiə imkanlarının gücləndirilməsi istiqamətində ümumi mövqe mövcuddur.
Şərhçinin fikrincə, ABŞ Ukraynaya dəstəyini tam dayandırmayacaq. O qeyd edib ki, Vaşinqton Rusiya-Çin münasibətləri fonunda daha geniş geosiyasi balansı nəzərə alır və Ukraynanın zəifləməsinin qlobal maraqlar baxımından arzuolunan olmadığını hesab edir.
