Konqo Demokratik Respublikasında Ebola virusuna yoluxanların sayı 2 344 nəfərə çatıb. Epidemiya nəticəsində 930 nəfər həyatını itirib, xəstəliyin əsas yayılma mərkəzi İturi əyaləti olaraq qalır.
Çin lideri Si Cinpinin ABŞ-yə rəsmi dövlət səfərinin sentyabr ayında baş tutacağı gözlənilir. ABŞ və Çin arasında keçiriləcək görüşdə qlobal ticarət, iqtisadi münasibətlər və təhlükəsizlik məsələlərinin müzakirəsi planlaşdırılır.
Moskva və Moskva vilayəti gecə saatlarında kütləvi PUA hücumlarına məruz qalıb. Hücumlar nəticəsində “Wildberries” logistika kompleksi, neft bazası və sənaye obyektlərində yanğın baş verib, bir neçə nəfər yaralanıb.
İranın Mircavə şəhərində məscid imamı Məhəmməd Ənvər Rigi silahlı şəxslərin hücumu nəticəsində öldürülüb. Hadisənin səbəbi və hücum edən şəxslərin kimliyi hələlik məlum deyil.
ABŞ Prezidenti Donald Tramp İranın hərbi imkanlarının tam sıradan çıxmadığını bildirib. O, Tehranın raket və PUA ehtiyatlarına malik olduğunu, həmçinin müəyyən istehsal potensialını saxladığını açıqlayıb.
Yaxın Şərqdə artan gərginlik neft bazarlarında bahalaşmaya səbəb olub. “Brent” markalı neftin qiyməti 90 dolları, WTI markalı neftin qiyməti isə 84 dolları keçib.
ABŞ dövlət katibi Marko Rubio İranla münaqişənin diplomatik yollarla həll edilməsinə çalışacaqlarını bildirib. O, mümkün razılaşmanın real şərtlərə əsaslanmalı və tərəflər tərəfindən yerinə yetirilməli olduğunu qeyd edib.
ABŞ və İran arasında qarşıdurmanın genişlənə biləcəyi barədə xəbərdarlıqlar artır. ABŞ Yaxın Şərqdə hərbi qüvvələrini gücləndirsə də, resurs çatışmazlığı əməliyyat imkanlarını məhdudlaşdıra bilər. Tərəflər arasında qarşılıqlı zərbələr bölgədə gərginliyi daha da artırıb.
CENTCOM-un məlumatına görə, İranın İordaniyaya endirdiyi zərbələr nəticəsində iki ABŞ hərbçisi ölüb. Bundan əlavə, İraqda keçirilən əməliyyat zamanı daha bir ABŞ hərbçisi həlak olub, bir nəfər isə yaralanıb.
SEPAH İordaniya və Küveytdə ABŞ-nin istifadə etdiyi hərbi obyektlərə zərbələr endirdiyini iddia edib. Qurumun açıqlamasına görə, anqarlar, radar sistemi, PUA-lar və hərbi təyyarələr hədəfə alınıb.
SEPAH-ın iddiasına əsasən, Hörmüz boğazında təhlükəli marşrutla hərəkət etməyə çalışan iki neft tankeri partlayıb. Hadisə ilə bağlı məlumatı Tasnim agentliyi yayıb.
CENTCOM İrana qarşı ardıcıl doqquzuncu gecə həyata keçirilən hücumların başa çatdığını bildirib. Hədəflər arasında HHM sistemləri və hərbi obyektlər olub.