ABŞ-də qızılcaya yoluxma halları son 35 ilin ən yüksək həddinə çatıb. İyulun 21-dək 2 295 yoluxma qeydə alınıb. Mütəxəssislər artımı əsasən peyvəndlənmə səviyyəsinin azalması ilə əlaqələndirirlər.
Rumıniyanın Braşov şəhəri yaxınlığındakı "Kronospan" zavodunda iki güclü partlayış baş verib. İkinci partlayış nəticəsində müəssisənin korpuslarından birinin damı dağılıb. Hadisənin səbəbi və mümkün zərərçəkənlərlə bağlı rəsmi açıqlama yoxdur.
Günəşdə son iki həftənin ən güclü alışması baş verib. Alimlər son sutka ərzində ümumilikdə 20-yə yaxın alışmanın qeydə alındığını bildiriblər. Hazırda bu proseslərin Yer üçün birbaşa təhlükə yaratmadığı vurğulanır.
Fransanın Var bölgəsində başlayan meşə yanğını 2500 hektar əraziyə yayılıb. Təhlükə səbəbindən yüzlərlə sakin təxliyə olunub, minlərlə ev işıqsız qalıb. Yanğının söndürülməsinə 1200 nəfərlik heyət və aviasiya qüvvələri cəlb edilib.
Vyetnamın Donq Nay şəhəri yaxınlığında yataq tipli avtobus qəzaya uğrayaraq yanıb. Hadisə nəticəsində yeddi nəfər ölüb, beş nəfər yaralanıb.
ABŞ administrasiyası artan miqrant sayına görə yeni saxlanma mərkəzlərinin tikintisini planlaşdırır. Layihənin ümumi dəyərinin 10 milyard dollar olacağı və 14 fərqli ərazini əhatə edəcəyi bildirilir.
ABŞ-dan yayılan meşə yanğını tüstüləri Kanadanın Britaniya Kolumbiyası əyalətində hava keyfiyyəti ilə bağlı xəbərdarlığa səbəb olub. Hadisə Donald Trampın Kanadanı yanğınlarla bağlı tənqid etməsindən sonra gündəmə gəlib.
Şri-Lankada qoruyucu dəbilqə istehsalı zavodunda yanğın baş verib. Hadisə nəticəsində azı beş nəfər ölüb, xilasedicilər axtarış işlərini davam etdirir.
Alyaska sularında hərəkət edən "National Geographic Sea Bird" ekspedisiya gəmisində üçüncü dəfə norovirus hadisəsi qeydə alınıb. 62 sərnişindən 18-də infeksiya aşkarlanıb.
Şri-Lankada denge qızdırması epidemiyasına qarşı mübarizədə hərbi PUA-lardan istifadə edilir. Ölkədə ilin əvvəlindən 76 min yoluxma və 53 ölüm qeydə alınıb.
Əfqanıstanın Nuristan vilayətində baş verən daşqınlar nəticəsində azı 20 nəfər ölüb, 100-dən çox insan itkin düşüb. Xilasetmə və axtarış işləri davam edir.
Hindistanın şimal-şərqində güclü yağışlar torpaq sürüşməsinə səbəb olub və nəticədə tikilməkdə olan tunel çöküb. Hadisə zamanı 9 işçi ölüb, 20-dən çox şəxsin tuneldə qaldığı bildirilir.